TOW#507 – Само да е евтино

0

Многу често, во разговор со наши менаџери и сопственици на компании, се расправаме (дискутираме) околу концептот на „евтино”. Поради тоа што сме многу чувствителни на цените како пазар, и поради нашиот лош економски стандард, често знаат да кажат дека мораат да нудат производи или услуги што се „евтини”. „Само да е евтино, и сè ќе пројде кај нас”, тоа е ставот на повеќето од нашите менаџери.

Прво, да разјасниме дека, „евтино” и „скапо” не постојат како концепти. Што значи евтино, а што значи скапо!? За кого е тоа евтино, а за кого скапо?! Некои возат автомобили од 100-200.000 евра. Дали тоа е евтино или скапо?! Перцепцијата најмногу ќе зависи од позиционирањето на производот или на услугата. Поточно, за кого е наменет/а. За секој производ и услуга си има своја целна група, или како што велат старите, „за секое лонче има капаче“. Секогаш кога се развива еден бизнис треба да сме свесни како и каде ќе го позиционираме производот или услугата.

Од самата стратегија ќе зависи кому се обраќаме, на колкав дел од пазарот, кој ни е потенцијалот и каков производ и услуга ќе понудиме. Доколку така ги поставиме работите, и развиеме јасна и правилна стратегија, концептите на евтино и скапо нема да се важни. Од аспект на купувач, „скапо” е нешто што не може да си го дозволиме. Но, тоа не значи дека (иако има и такви) производот е позициониран повисоко со цена, во однос на неговата вредност.

Во секој случај, разбирливо е дека кога имаш понизок пазарен стандард, а сакате да продавате производ или услуга на поголем дел од пазарот, вие треба да се позиционирате со поекономична понуда. Но, и тука треба да се знае и да се земе предвид, дека постојат повеќе различни нивоа на „економична” понуда. Затоа, немојте секогаш да ги барате и да ги нудите „најевтините” производи/ услуги, туку направете убава стратегија, дефинирајте го пазарниот удел (размислете дали ви се поклопува со вашата бизнис визија) и поставете се во вашиот пазарен сегмент.

Со успех во промените,
Петар Лазаров
Член на тимот
МАКЕДОНИЈА-ЕКСПОРТ Консалтинг
www.macedonia-export.com

При објавување материјали од порталот www.hybread.mk во друг медиум, задолжително наведете го изворот од кој е преземен текстот